Til eru margar gerðir slökkvitækja sem hafa má á heimilum. Slökkvitæki á að vera við útgönguleið og vel sýnilegt. Mikilvægt er að allir á heimilinu viti hvar slökkvitæki eru geymd og hvernig á að beita þeim. Slökkvitæki þarf að yfirfara reglulega af viðurkenndum þjónustuaðilum. Algengustu tækin eru 6 kg dufttæki og 9 l léttvatnstæki. Kallið alltaf til slökkvilið ef kviknað hefur í til þess að tryggja að örugglega hafi tekist að slökkva eldinn.

Duftslökkvitæki eru ætluð á alla elda. Oft getur þó þurft að nota vatn á eftir til að tryggja að búið sé að slökkva alla glóð.

Léttvatnstæki eru með froðublöndu. Þau er hægt að nota á eld í föstum efnum og auk þess á eld í olíu og feiti. Varast skal að nota léttvatnstæki á rafmagnstæki sem eru í sambandi.

Sjónvarpsslökkvitæki er mjög góður öryggisbúnaður sem hægt er að koma fyrir í raftækjum eins og sjónvörpum, þvottavélum og þurrkurum. Prófanir hafa sýnt að tækin slökkva eldinn á mjög skömmum tíma og veita mikið öryggi.

Eldvarnateppi eru til í mörgum stærðum. Þau má þvo og því er hægt að og nota þau aftur og aftur. Teppið er lagt yfir það sem brennur, t.d. pönnu eða pott með olíu eða feiti. Ef teppið fer ofan í feiti í potti getur logað í gegnum það. Þá þarf að taka teppið af og slökkva í því t.d. með því að trampa á því og byrjað upp á nýtt.